ബഹുമാനപ്പെട്ടവരെ അധ്യാപകരെ

ക്ലാസ്സിൽ ഏറ്റവും പിന്നിലെ ഡസ്കിൽ തല കുനിച്ചു കിടക്കുന്നവളുടെ കണ്ണ് കലങ്ങിയത് പ്രേമനൈരാശ്യത്താലല്ല. ഇന്നലെയും വീട്ടിൽ പട്ടിണിയായിരുന്നു അതോർത്താണ്.

ക്ലാസ്സിൽ പഠിപ്പിക്കുമ്പോൾ മറ്റൊരുവൾ പുറത്തേയ്ക്ക് നോക്കി ഇരുന്നത് കാമുകനെയല്ല വഴിയിൽ ശല്യം ചെയ്യുന്നവരിൽ നിന്ന് എങ്ങനെ രക്ഷപ്പെടുമെന്ന് ഓർത്താണ്.

പാതി വഴിയിൽ എത്തിയ കണക്ക് തെറ്റിച്ചതവൾ സ്വപ്നം കണ്ടിട്ടല്ല അമ്മയെ തല്ലുന്ന അച്ഛനെ ഓർത്താണ്.

ഉറക്കം തൂങ്ങിയിരുന്നവളോട് ചോദ്യം ചോദിച്ച് ചൂരൽക്കഷായം കൊടുത്തില്ലേ? അവളുറങ്ങാത്തത് ഉറക്കത്തിൽ അവളിൽ ഇഴയുന്ന കൈകൾ ഭയന്നാണ്. 

ബഹുമാനപ്പെട്ടവരെ അധ്യാപകരെ നിങ്ങളറിയാത്ത കഥകൾ അവൾക്കുണ്ട്.