പുഴപ്പെണ്ണ്

 പുഴയോട് അവൾക്ക് പ്രണയമായിരുന്നു

പുഴയരികിലെ വീട്ടിലെ ചെക്കൻ പെണ്ണ് കാണാനെത്തിയപ്പോൾ

അത് നടക്കാൻ നേർച്ചയിട്ടത് പുഴ കാണാൻ കൊതിച്ചിട്ടാണ്

നാട്ടിലെ പെണ്ണുങ്ങൾ അലക്കാനും കുളിക്കാനും പുഴയിലേയ്ക്ക് പോകുമ്പോഴും കാണാൻ കൊതിച്ച പുഴയിലവൾ ഇറങ്ങാതെ കടവത്തിരുന്നു പുഴയോട് കഥ പറഞ്ഞു

അവളുടെ പൊന്നിൻ്റെ തൂക്കം കുറയുന്നതും അവളുടെ ഉടൽ മെലിഞ്ഞുണങ്ങുന്നതും കൺതടങ്ങളിലെ കറുപ്പ് പടരുന്നതും പുഴയറിഞ്ഞിട്ടും മിണ്ടാതൊഴുകി

കുളി കഴിഞ്ഞ് ക്ലാവ് മണക്കുന്ന താലി അണിയാനെടുത്തപ്പോഴാണ് അവൻ അവളെ വിഴുപ്പലക്കാൻ  കൂട്ട് വിളിച്ചത്

ഉച്ചമയങ്ങുന്ന നേരം ഇളം ചൂടുള്ള

മണൽത്തട്ടിലെ പൂഴിയിൽ പുഴയിലേയ്ക്ക് മിഴിനട്ടിരിക്കുമ്പോഴാണ് തൻ്റെ ഉള്ളിലും ഒരു പുഴയൊഴുകുന്നുണ്ടെന്നവൾ  കണ്ടുപിടിച്ചത് 

ഒഴുകിപ്പോയ തുണിയെടുക്കാനവളെ വിളിച്ചപ്പോൾ പുഴയെ പേടിയാണെന്നവൾ മറന്നു പോയി

അന്നേരം പുഴയിലെ തിളക്കം പ്രണയമാണെന്നവൾക്ക് തോന്നി.

അടിത്തട്ടിലെ മാണിക്യം കാണിക്കാൻ കൂട്ടിക്കൊണ്ട് പോയ പുഴ അവളുടെ വയറ് വീർപ്പിച്ചത് മച്ചിയെന്ന് വിളിച്ച പെണ്ണുങ്ങളെയെല്ലാം കാണിക്കാൻ അവള് തിടുക്കപ്പെട്ടു

പതിവ് തെറ്റിച്ച് മൂന്നാം നാളും പുഴയവളെ വിട്ട് പിരിഞ്ഞില്ല 

എന്നേക്കുമായവൾക്ക് മാത്രമായി കൊട്ടാരം പണിയുന്ന തിരക്കിലായിരുന്നത്രേ പുഴ

പ്രണയസ്മാരകമാക്കാൻ..

🖋️ ഷബാന മഠത്തിൽ